“Güvən Telefonu” qaynar xətti fəaliyyətə başladı.


Xızı rayonunda "Təhsildə inkişaf və innovasiyalar üzrə birinci qrant müsabiqəsi"nin ümumi təhsil müəssisələri kateqoriyası üzrə qalibi olmuş "Güvən telefonu" layihəsi çərçivəsində “Güvən Telefonu” qaynar xətti fəaliyyətə başladı.

"Güvən telefonu" layihəsinin məqsədi Xızı rayon tam orta məktəblərində işçi heyəti ilə təlimlər keçərək psixoloq operatorların hazırlanmasından ibarətdir. Təlimlər peşəkar operator psixoloq tərəfindən keçirilərək, telefon vasitəsi ilə şagirdlərə veriləcək məsləhətlərin istiqamətləri, problemlərin həlli yolları tam şəkildə mənimsədildi və eyni zamanda təlimlərlə bərabər pedaqoqlar tərəfindən layihə çərçivəsində maarifləndirici görüşlər keçirilərək qaynar xəttin nömrəsi və mahiyyəti şagirdlərə anladıldı.

Layihə çərçivəsində təlimlər və maarifləndirici görüşlər Xızı rayonunun bütün tam orta məktəblərində keçirildi. Görüşlər zamanı 210 nəfər şagird heyəti ilə maarifləndirici görüşlər, 60 nəfər işçi heyəti ilə isə təlimlər keçirildi.

Maarifləndirici görüşlər və təlimlər yekunlaşdıqdan sonra 06 Noyabr 2017-ci il tarixindən Giləzi qəsəbə tam orta məktəbində təlim keçmiş könüllü operatorlardan ibarət "Güvən telefonu" qaynar xətti fəaliyyətə başlamışdır.

Güvən Telefonunun qaynar xətti: (023-31)-60-187

Yaşımızdan, cinsimizdən, ailə vəziyyətimizdən və sosial statusumuzdan asılı olmayaraq, hər birimiz çətin vəziyyətlə üzləşə bilərik. Belə vaxtlarda məsləhətə, mənəvi dəstəyə, fikrimizi söyləməyə, məzəmmət olunmadan dərk edilməyə hava-su kimi ehtiyac duyuruq. Kimsə dərdini yaxın dostları ilə, iş yoldaşı ilə bölüşməklə yüngülləşir, kimsə tanımadığı təsadüfi adama ürəyini boşaltmağa üstünlük verir.

Xüsusilə yeniyetmələrin əhvalı dəyişikliklərə qarşı daha həssasdır. Gənclərin psixikası zərif olur. Ən cüzi şey, istənilən ağır söz, məzəmmət yeniyetmənin əhvalını pozmaq üçün kifayətdir. Bu gün çətin anlarda dostların, valideynlərin köməyi ilə yanaşı, peşəkarlara da müraciət etmək mümkündür. Üstəlik, bu zaman yardım üçün müraciət edən şəxsin anonimliyi tam təmin olunur. Bunun üçün əhaliyə psixoloji yardım göstərən xidmət, başqa sözlə, "güvən telefonu" fəaliyyətdədir.

Şübhəsiz, adi telefon zənginin taleyimizi dəyişəcəyinə, bütün problemləri tam həll edəcəyinə heç birimizin inamı yoxdur. Lakin "güvən telefonu"na zəng vurmaqla hər an peşəkar psixoloji yardım, ağıllı məsləhət və istiqamət alacağımıza ümid edə bilərik.


Minion.az

 “Güvən Telefonu” qaynar xətti fəaliyyətə başladı.